新作"蓋亞奧德賽" - sww

2015/01/20 (二) 16:01:05

距離上次自已留言已經有一年半有多,
響lemegeton ep2推出後, 有感手機市場絕大多數係輕度玩家,
而且手機並唔適合玩操作性高既遊戲,
enborn-x同lemegeton正正就係唔適合既類型@@lll

所以響ep2推出之後, 原本計劃推出enborn-x2,
響制作中途發現難以引入現行既"課金制"
而且又會繼續挑戰手機唔適合操作性高遊戲呢個難題,
再三討論之後, 我地決定推出卡片遊戲,
老實講, 我本人唔鐘意呢類遊戲, 更加唔會出轉珠遊戲!
但係市場唔需要動作/射擊遊戲既話, 再推出落去係冇意義..

新作係卡片對戰, 第一次製作卡game, 比原本諗既麻煩得多,
原本卡game係低製作技術就可以做既野, 但係就需要大量既圖,
人手不足之下, 要畫300張圖以上既話相當需時,
所以有時間都係用黎畫畫, 所幸既事, 係畫圖時間響可接受限期內完成,
雖然我宜家都要將一部份圖畫重新繪畫過, 不過遊戲整體算係完成80% (包括系統/ui之餘此類)

我本人對"蓋亞奧德賽"並冇太多信心,
純粹係試下出卡game, 睇下反應點,
要講賣點既話, 基本上唔係太多, 圖既質素唔算十分好,
圖既風格係遍向卡通化, 算係同現時流行既風格有d唔同,
咁唯有響系統上花d心思, 遊戲玩法只係放d卡出去,
配合數值同技能將cpu打低就叫做贏,
玩法就咁睇, 十個人會有十一個人會話係垃圾,
不過我自已玩過之後, 遊戲做到我想既方向,
就係需要部署同相當思考既卡game, 而唔係現時大多數鬥大既卡game,
現時好多卡game都係數值王道, 技能為輔, (單指手機卡game)
不過蓋亞奧德賽就做到數值同技能之間既平衡,
即使我有數值勁到爆炸既卡, 響冇腦放卡之下會有機會俾cpu一擊必殺

宜家遊戲進行調整階段, 大家都諗緊點樣優化個系統,
硬要講好唔好玩, 我覺得宜家重差少少, 玩法唔夠多,
所以新增一d系統上去, 令到玩家可以玩既野多一d

至於lemegeton ep3
雖然有希望推出既呼聲, 但係我認為會推出既機率十分之微,
一來市場唔大, 二來製作時間需時, 三來現時手機功能更強,
lemegeton既質素表現已經追唔上, 推出ep3只會更少人玩

又一次証明遊戲分ep通常都唔work,
以前我地有時明知一d野, 都硬係要去挑戰, 我都唔知點解釋呢種心態係乜XDlll